யார் ஆட்சிக்கு வந்தாலும் 2028 இல் மீண்டும் வங்குரோத்து நிலை

யார் ஆட்சிக்கு வந்தாலும் 2028 ஆம் ஆண்டு நாடு மீண்டும் வங்குரோத்து நிலைக்குச் செல்லுமெனவும் கடந்த 4 ஆண்டுகளில் அரசு ஒவ்வொரு குடிமகனிடமிருந்தும் ஒரு இலட்சம் ரூபாவை வரியாக அறவிட்டுள்ளதாகவும் ஐக்கிய குடியரசு முன்னணியின் பாராளுமன்ற உறுப்பினர் பாட்டலி சம்பிக்க ரணவக்க தெரிவித்துள்ளார்.

மின்சார சபையின் அதிகாரிகள் தவறான தரவுகளை சமர்ப்பித்த சம்பவங்கள் பல அவதானிக்கப்பட்டன. அதன் காரணமாக மக்களுக்குப் பொறுப்புக்கூற வேண்டிய நிறுவனம் என்ற வகையில் பொதுப் பயன்பாடுகள் ஆணைக்குழு இது தொடர்பில் கவனம் செலுத்த வேண்டுமென அவர் சுட்டிக்காட்டியுள்ளார்.

மின்சார சபையின் புள்ளிவிபரங்கள் மிகவும் தவறானவை என தெரியவந்துள்ளது. மின் உற்பத்தி நிலையங்களின் நிலையான கட்டணம் பெருமளவு உயர்த்தப்பட்டுள்ளது. மின்சார சபை அதிகாரிகளுக்கு கணிதம் தொடர்பில் சரியான புரிதல் இருக்கிறது. ஆனால் அந்த அறிவைப் பயன்படுத்தி மோசடிச் செயல்களில் ஈடுபடத் தூண்டுவதாக குற்றச்சாட்டுகள் உள்ளன.

இவ்வாறானதொரு சூழ்நிலையில் சரியான நிலைமையைப் புரிந்து கொள்வதற்கு விஞ்ஞான ரீதியான ஆய்வு ஒன்றை மேற்கொள்ள வேண்டியது பொதுப் பயன்பாடுகள் ஆணைக்குழுவின் பொறுப்பாகும்.

நாட்டின் பொருளாதாரத்தை நேரடியாக பாதிக்கும் காரணியாக மின்சாரத் துறையை சுட்டிக்காட்டலாம். கடந்த ஆண்டு 1900 தொழிற்சாலைகளில் மின்சாரம் துண்டிக்கப்பட்டது. அதே சமயம் தொழில் துறையில் மின்சார விற்பனை இருபது சதவீதம் குறைந்துள்ளது. இலங்கையுடன் ஒப்பிடும் போது சிங்கப்பூர் மற்றும் ஹொங்கொங்கில் மாத்திரமே தொழிற்துறை மின் கட்டணம் அதிகரித்துள்ளது. கைத்தொழில் போட்டித்தன்மையுடன் கூடிய வியட்நாம், பங்களாதேஷ் அல்லது தென்னிந்தியாவை விட இலங்கையின் மின்சார கட்டணம் 40 வீதத்திற்கும் அதிகமாக இருப்பதாக சுட்டிக்காட்டுகிறார்.

அதன்படி இலங்கையின் கைத்தொழில்கள் வீழ்ச்சியடைந்து வருகின்றன. மின்சாரக் கட்டணத்தில் முதலீட்டாளர்கள் போட்டி நாடுகளுக்குச் செல்கின்றனர். கைத்தொழில் துறையின் வீழ்ச்சிக்கு இது ஒரு முக்கிய காரணியாக உள்ளது.

இவ்வாறான நிலையிலும் அரச வருமானம் இரண்டாயிரம் பில்லியன் ரூபாவால் அதிகரித்துள்ளது. ஒட்டுமொத்த மக்களிடம் இருந்து வரி வசூலிக்கப்படுகிறது. கடந்த நான்கு ஆண்டுகளில் ஒவ்வொரு குடிமகனிடமும் அரசு 1 லட்சம் ரூபா வசூலித்துள்ளது நிரூபணமாகிறது.

பொருளாதாரம் சுருங்கியதால் ஒரு குடும்பம் மேலும் ஒரு லட்சம் ரூபாயை இழந்துள்ளது. இதன்படி, நான்கு பேர் கொண்ட குடும்பம் எட்டு இலட்சம் ரூபாவை இழந்துள்ள சூழலில், மக்கள் கடும் அழுத்தங்களுக்கு உள்ளாகியுள்ளதாகவும் இவ்வாறான நிலையில் மக்களை மையப்படுத்தியே மின்சாரம் தொடர்பான முடிவுகள் எடுக்கப்பட வேண்டும் எனவும் தெரிவித்துள்ளார்.

அதிக மின்சாரக் கட்டணம் மற்றும் அதிக எரிபொருள் விலைகள் காரணமாக 2028 ஆம் ஆண்டளவில் இலங்கை அரசாங்கம் கடனை செலுத்த முடியாத நிலை ஏற்படும். யார் ஆட்சி செய்தாலும் தற்போதுள்ள நிலைமைகளின் கீழ் நாடு 2028 இல் மீண்டும் வங்குரோத்து நிலைக்குத் தள்ளப்படும் எனவும் கணித்துள்ளார்.