17 ஆவது வாரமாகத் தொடரும் யாழ். போராட்டத்தில் மயங்கி விழுந்த பெண்!

பலாலி மக்களின் பூர்வீகக் காணிகளை விடுவிக்கக் கோரி முன்னெடுக்கப்பட்டு வரும் தொடர் போராட்டம், 17 ஆவது வாரமாகவும் நேற்று ஞாயிற்றுக்கிழமை யாழ்.பலாலிச் சந்தியில் இடம்பெற்றது. கடுமையான வெயிலையும் பொருட்படுத்தாது தமது பூர்வீக நிலங்களை மீட்டெடுக்க வேண்டும் என்ற உறுதியுடன் போராட்டத்தில் ஈடுபட்ட மக்கள் இறந்தாலும் பலாலியில் தான் இறப்போம் என உணர்வுபூர்வமாகத் தமது நிலைப்பாட்டை வெளிப்படுத்தினர்.

நீண்டகாலமாகத் தமது சொந்த நிலங்களிலிருந்து விலகியிருக்க வேண்டிய நிலைக்குத் தள்ளப்பட்டுள்ளதாகத் தெரிவிக்கும் பலாலி மக்கள் தமது காணிகளை மீளப் பெற்றுக்கொண்டு சொந்த மண்ணில் மீண்டும் குடியேறுவதற்கான கோரிக்கையைத் தொடர்ந்து வலியுறுத்தி வருகின்றனர். இந் நிலையில், நேற்றைய போராட்டத்தின் போது நிலவிய கடுமையான வெயிலுக்கு மத்தியில் போராட்டத்தில் கலந்துகொண்ட குடும்பப் பெண்ணொருவர் திடீரென மயக்கமுற்று நிலத்தில் விழுந்தார். இதனால், அப் பகுதியில் சிறிது நேரம் பரபரப்பு ஏற்பட்டது. எனினும், உடல் உபாதைகளையும், கடுமையான வெப்பத்தையும் எதிர்கொண்ட போதிலும் தமது கோரிக்கையைக் கைவிடாமல் மக்கள் தொடர்ச்சியாகப் போராட்டத்தில் ஈடுபட்டனர்.

இதேவேளை, தமது பூர்வீக நிலங்களை மீட்டெடுத்துச் சொந்த மண்ணில் மீண்டும் வாழ வேண்டும் என்ற எதிர்பார்ப்புடன் தொடர்ந்து போராடி வரும் பலாலி மக்களின் கோரிக்கைகளுக்கு உரிய தீர்வு எப்போது கிடைக்கும்? என்ற கேள்வி தற்போது மீண்டும் எழுந்துள்ளது.