ஜனாதிபதிக்கும் மொட்டுக்கும் இடையில் அரசியல் மோதல்; புத்தாண்டுக்குப் பின்னர் அரசியல் குழப்பங்கள் தலைதூக்கலாம்

சிங்கள, தமிழ் புத்தாண்டுக்குப் பின்னர் அரசியல் குழப்பங்கள் தலைதூக்கும் என்று எதிர்பார்க்கப்படுகிறது. இந்த குழப்பத்திற்கான மூல காரணம் ஜனாதிபதி ரணில் விக்கிரமசிங்கவிற்கும் ஸ்ரீலங்கா பொதுஜன பெரமுனவிற்கும் இடையே உருவாகியுள்ள அரசியல் மோதலே என ‘சிலோன் ருடே’ தெரிவிக்கிறது.

ஜனாதிபதி ரணில் விக்கிரமசிங்க, ஜனாதிபதித் தேர்தலுக்கு தயாராகுமாறு அமைச்சரவைக்கு அண்மையில் பணிப்புரை விடுத்திருந்த நிலையில், பசில் ராஜபக்ஷவின் தலைமையிலான ஸ்ரீலங்கா பொதுஜன பெரமுன, முதலில் பொதுத் தேர்தலை நடத்துவதற்கு ஆதரவாக உள்ளது. இந்த வாரம் இடம்பெற்ற கலந்துரையாடலின் போதே பசில் ராஜபக்ஷ இந்த விருப்பத்தை ஜனாதிபதியிடம் தெரிவித்ததாக தகவல்கள் தெரிவிக்கின்றன.

எவ்வாறாயினும், அரசியலமைப்பின் பிரகாரம் ஜனாதிபதித் தேர்தலுக்கு முன்னுரிமை வழங்கப்பட வேண்டுமென ஜனாதிபதி தெரிவித்துள்ளார். இன்னும், பொதுஜன பெரமுன ஜனாதிபதித் தேர்தலுக்கு முன்னர் பொதுத் தேர்தலை நடத்துவதற்கு தொடர்ந்து அழுத்தம் கொடுக்கிறது.

இதற்கு பதிலளிக்கும் வகையில், ஸ்ரீலங்கா பொதுஜன பெரமுனவிற்கும் ஜனாதிபதிக்கும் இடையிலான அரசியல் முரண்பாடுகளை தணிக்கும் வகையில் இரண்டு தேர்தல்களையும் ஒரே நேரத்தில் நடத்துமாறு ஜனாதிபதியிடம் முன்மொழிவது குறித்து ஆளும் கட்சி பாராளுமன்ற உறுப்பினர்கள் குழு சிந்தித்து வருகின்றது. இந்த பாராளுமன்ற உறுப்பினர்கள் பொதுத் தேர்தல் மற்றும் ஜனாதிபதி தேர்தல்களை ஒத்திசைப்பதன் மூலம் தற்போது நிலவும் மோதலுக்கு தீர்வு காண முடியும் என நம்புகின்றனர். இந்த யோசனை தொடர்பில் கட்சியின் தலைவரும், முன்னாள் ஜனாதிபதியுமான மஹிந்த ராஜபக்ஷ, பசில் ராஜபக்ஷ மற்றும் கட்சியின் சிரேஷ்ட உறுப்பினர்களுடன் ஆலோசனை நடத்த திட்டமிட்டுள்ளனர்.

எவ்வாறாயினும், சில பொதுஜன பெரமுன உறுப்பினர்கள் இந்த அணுகுமுறை குறித்து சந்தேகம் தெரிவித்துள்ளனர். ஒரே நாளில் இரண்டு தேர்தல்களை நடத்துவது நடைமுறைச் சாத்தியமற்றது மற்றும் வாக்காளர்களிடையே ஏற்படக்கூடிய குழப்பத்தையும் அவர்கள் சுட்டிக் காட்டினர்.

இதேவேளை, ஸ்ரீலங்கா பொதுஜன பெரமுனவின் அமைச்சரவை அமைச்சர்கள் மற்றும் இராஜாங்க அமைச்சர்கள் எதிர்வரும் தேர்தலில் ஜனாதிபதியுடன் இணைந்து செயற்படுவதற்கு தயாராகி வருவதாக அவதானிக்கப்பட்டது. அண்மையில் நடைபெற்ற கட்சியின் செயற்குழு கூட்டத்தின் போது இது தொடர்பான கருத்துக்கள் வெளியிடப்பட்டுள்ளதாக தெரிவிக்கப்படுகின்றது.

கட்சி தனது முடிவில் இருந்து விலகி மாற்று நடவடிக்கையை தேர்வு செய்தால், இந்தக் குழு ஜனாதிபதிக்கு ஆதரவாக அணி திரளத் தயாராக உள்ளது. அமைச்சுப் பதவிகளை வகிக்காத பல மூத்த கட்சி உறுப்பினர்களின் பங்கேற்புடன், இந்தக் குழுவிற்கு இடையில் கலந்துரையாடல்கள் ஏற்கனவே ஆரம்பித்துள்ளன.

மேலும், ஸ்ரீலங்கா சுதந்திரக் கட்சியில் இருந்து நீக்கப்பட்ட மஹிந்த அமரவீரவும் ஜனாதிபதித் தேர்தலில் தற்போதைய ஜனாதிபதிக்கு ஆதரவளிக்க உள்ளதாக ஊகிக்கப்படுகிறது.

ஆதரவை வெளிப்படுத்தும் முறையைப் பொறுத்தவரை, பாராளுமன்ற உறுப்பினர் நிமல் லான்சா தலைமையிலான புதிய கூட்டணியுடன் இணைந்து கொள்வதா அல்லது ஒன்றிணைந்த குழுவாக ஜனாதிபதிக்கு நேரடியாக ஆதரவளிப்பதா என்பது தொடர்பில் ஸ்ரீலங்கா பொதுஜன பெரமுனவில் கலந்துரையாடல்கள் இடம்பெற்று வருகின்றன.

மேலும், எதிர்காலத்தில் ஸ்ரீலங்கா பொதுஜன பெரமுனவின் ஒரு பிரிவினர் மற்றும் தற்போது பாராளுமன்றத்தில் சுயேச்சையாக உள்ள பல பாராளுமன்ற உறுப்பினர்களும் இந்தப் புதிய கூட்டணியில் இணையலாம் என அரசியல் வட்டாரங்கள் தெரிவித்துள்ளன.

மேலும், ஐக்கிய மக்கள் சக்தி பாராளுமன்ற உறுப்பினர்கள் சிலர் ஜனாதிபதித் தேர்தலில் தற்போதைய ஜனாதிபதிக்கு ஆதரவளிக்க விரும்புவதாக தெரிவித்துள்ளனர். பொதுச் சின்னத்தில் ஒன்றிணைந்த கூட்டணியின் ஒரு பகுதியாக ஜனாதிபதி தேர்தலில் போட்டியிட வேண்டும் என்று அவர்கள் முன்மொழிவதாகவும் ‘சிலோன் ருடே’ தெரிவிக்கிறது.