புயலின் பேரழிவு தொடர்கிறது; 200 க்கும் அதிக உயிரிழப்பு 200 பேருக்கும் மேல் மாயம்

நாட்டில் கடந்த சில நாட்களாக தொடரும் கடும் காற்று மற்றும் மழையுடன் கூடிய சீரற்ற கால நிலையினால் ஏற்பட்ட மண்சரிவு மற்றும் வெள்ளம் உள்ளிட்ட அனர்த்தங்களால் 200 க்கும் மேற்பட்டோர் உயிரிழந்துள்ளதுடன், 200க்கும் மேற்பட்டோர் காணாமல் போயுள்ளனர்.

கண்டி மற்றும் பதுளை மாவட்டங்களிலேயே அதிகளவான உயிரிழப்புகளும், காணமால் போனோரின் எண்ணிக்கையும் பதிவாகியுள்ளன.

இதன்படி கண்டி மாவட்டத்தில் நேற்று சனிக்கிழமை பிற்பகல் வரையிலான தகவல்களின்படி மண்சரிவுகளில் சிக்கி 52 பேர் உயிரிழந்துள்ளனதுடன், 105 பேர் காணாமல் போயுள்ளனர். அத்துடன் பதுளை மாவட்டத்தில் 35 பேர் உயிரிழந்துள்ளதுடன், 27 பேர் காணாமல் போயுள்ளனர். அத்துடன் குருநாகல், மாத்தளை மற்றும் கேகாலை ஆகிய மாவட்டங்களிலும் பல உயிரிழப்பு சம்பவங்கள் பதிவாகியுள்ளன.

இதேவேளை நேற்று பிற்பகல் 2 மணி வரையிலான தகவல்களின்படி கடந்த சில தினங்களாக நிலவும் சீரற்ற காலநிலையால் 25 மாவட்டங்களிலும் 179,868 குடும்பங்களை சேர்ந்த ஏழு லட்சத்துக்கும் அதிகமானோர் பாதிக்கப்பட்டுள்ளதுடன், இவர்களில் 22,212 குடும்பங்களை சேர்ந்த 78,000க்கும் மேற்பட்டோர் நாடு முழுவதும் 716 இடங்களில் அமைக்கப்பட்டுள்ள பாதுகாப்பு முகாம்களில் தங்க வைக்கப்பட்டுள்ளதாக அனர்த்த முகாமைத்துவ நிலையம் தெரிவித்துள்ளது.

கொழும்பு மாவட்டத்தில் 25,159 குடும்பங்களை சேர்ந்த 99,668 பேர் பாதிக்கப்பட்டுள்ளதுடன், இவர்களில் 1217 குடும்பங்களை சேர்ந்த 6016 பேர் 61 இடங்களில் அமைக்கப்பட்டுள்ள பாதுகாப்பு நிலையங்களில் தங்க வைக்கப்பட்டுள்ளனர்.

கம்பஹா மாவட்டத்தில் 31,143 குடும்பங்களை சேர்ந்த 123,504 பேர் பாதிக்கப்பட்டுள்ளதுடன் இவர்களில் 2820 குடும்பங்களை சேர்ந்த 10467 பேர் 29 இடங்களில் அமைக்கப்பட்டுள்ள பாதுகாப்பு நிலையங்களில் தங்க வைக்கப்பட்டுள்ளனர்.

களுத்துறை மாவட்டத்தில் 429 குடும்பங்களை சேர்ந்த 1722பேர் பாதிக்கப்பட்டுள்ளனர். இந்த மாவட்டத்தில் பாதிக்கப்பட்டவர்களில் 82 குடும்பங்களை சேர்ந்த 444 பேர் பாதுகாப்பான இடங்களில் தங்க வைக்கப்பட்டுள்ளனர்.

புத்தளம் மாவட்டத்தில்36,098 குடும்பங்களை சேர்ந்த 135,922 பேர் பாதிக்கப்பட்டுள்ளதுடன், இந்த மாவட்டத்தில் 3007 குடும்பங்களை சேர்ந்த 11,221 பேர் 59 இடங்களில் அமைக்கப்பட்டுள்ள பாதுகாப்பு நிலையங்களில் தங்க வைக்கப்பட்டள்ளனர்.

குருநாகல் மாவட்டத்தில் 6804 குடும்பங்களை சேர்ந்த 23247 பேர் பாதிக்கப்பட்டுள்ளதுடன் 6 பேர் உயிரிழந்துள்ளனர்.

நுவரெலியா மாவட்டத்தில் மண்சரிவு மற்றும் வெள்ளம் காரணமாக 250குடும்பங்களை சேர்ந்த 920 பேர் பாதிக்கப்பட்டுள்ளனர். இந்த மாவட்டத்தில்6 பேர் உயிரிழந்துள்ளதுடன், 4 பேர் காணாமல் போயுள்ளனர்.

கண்டி மாவட்டத்தில் 7988 குடும்பங்களை சேர்ந்த 25,290பேர் பாதிக்கப்பட்டுள்ளனர். அத்துடன் மாத்தளை மாவட்டத்தில் 325 குடும்பங்களை சேர்ந்த 1800 பேர் பாதிக்கப்பட்டுள்ளனர். இந்த மாவட்டத்தில் 8 பேர் உயிரிழந்துள்ளதுடன், 3 பேர் காணாமல் போயுள்ளனர்.

இரத்தினப்புரி மாவட்டத்தில் 1867 குடும்பங்களை சேர்ந்த 7764 பேர் பாதிக்கப்பட்டுள்ளனர். கேகாலை மாவட்டத்தில் 2148 குடும்பங்களை சேர்ந்த 8311 பேர் பாதிக்கப்பட்டுள்ளனர். இந்த மாவட்டத்தில் 9 பேர் உயிரிழந்துள்ளதுடன், 24 பேர் காணாமல் போயுள்ளனர்.

பதுளை மாவட்டத்தில் 2306 குடும்பங்களை சேர்ந்த 7737பேர் பாதிக்கப்பட்டுள்ளதுடன் இந்த மாவட்டத்தில் மண்சரிவுகளில் சிக்கி 35 பேர் உயிரிழந்துள்ளதுடன். 27 பேர் காணாமல் போயுள்ளனர்.

மட்டக்களப்பு மாவட்டத்தில் 5338 குடும்பங்களை சேர்ந்த 16378 பேர் பாதிக்கப்பட்டுள்ளனர். திருகோணமலை மாவட்டத்தில் 10214 குடும்பங்களை சேர்ந்த 31634 பேர் பாதிக்கப்பட்டுள்ளனர். அம்பாறை மாவட்டத்தில் 6445 குடும்பங்களை சேர்ந்த 21164 பேர் பாதிக்கப்பட்டுள்ளனர். இந்த மாவட்டத்தில் 8 பேர் உயிரிழந்துள்ளனர்.

யாழ்ப்பாணம் மாவட்டத்தில் 2397 குடும்பங்களை சேர்ந்த 7513 பேரும், கிளிநொச்சி மாவட்டத்தில் 1156 குடும்பங்களை சேர்ந்த 3636 பேரும், முல்லைத்தீவு மாவட்டத்தில் 670 குடும்பங்களை சேர்ந்த 782 பேரும், வவுனியா மாவட்டத்தில் 2865 குடும்பங்களை சேர்ந்த 9666 பேரும் மற்றும் மன்னார் மாவட்டத்தில் 24,313 குடும்பங்களை சேர்ந்த 79,946 பேர் பாதிக்கப்பட்டுள்ளனர்.

மேலும் நேற்று மாலை வரையில் மாத்தளை, குருநாகல் மற்றும் கேகாலை உள்ளிட்ட மாவட்டங்களில் பல்வேறு மண்சரிவு அனர்த்தங்கள் பதிவாகியிருந்ததுடன், அதில் சிக்கி பல காணாமல் போயிருந்த நிலையில் மீட்புக்குழுக்கள் மீட்பு நடவடிக்கையில் ஈடுபட்டிருந்தனர். இதனால் உயிரிழந்தோர் எண்ணிக்கை மேலும் அதிகரிக்கலாம் என்று அஞ்சப்படுகிறது.

மேலும் களனி கங்கையின் நீர்மட்டம் உயர்வடைவதால் கம்பஹா மற்றும் கொழும்பு மாவட்டங்களில் வெள்ள நிலைமை நேற்று மாலையளவில் அதிகரித்திருந்தமையினால் இந்த மாவட்டங்களில் பாதிக்கப்பட்டவர்களின் எண்ணிக்கை மேலும் அதிகரிக்கலாம் என தெரிவிக்கப்பட்டுள்ளது.